Wei leeft esou eng Schatzsich oof?

Ma fir esou eng Aktioun brauch een zwou Parteien. Déi di de Schatz vergruewen (dat si mir!) an déi di de Schatz sichen (dat sidd dir!).

Hei awer de Kader:

• Mir annoncéiren de Start vun enger neier Juegd op Facebook, an och an engem klenge Blogpost op dësem Site. Et lount sech also heiansdo kucken ze kommen.

• D’Schätz sinn ëmmer an enger Sandkaul op enger Spillplaz vergruewen.

  • Nët méi déif wéi 10cm.

  • Loosst de Sand w.e.g. an der Sandkaul. D’Leit déi sech ëm d’Instandhaltung vun de Spillplaze këmmeren, wieren Iech verbonnen!

• Wann de Schatz nët schnell genuch fonnt gëtt, verrode mir e puer Tipps, wou ee siche soll goen, oder Rätselen, fir et bëssi méi spannend ze maachen.

• Wann dir e fannt da mellt Iech! Entweder op Facebook, oder iwwer de Kontaktformular op dësem Site! An da kënnt dir Äre Präis sichekommen :)

Wichteg: De Schatz ass mat engem klengen Uertungsgerät ekippéiert, fir dass mir bëssi gesinn, wéini e fonnt gouf. Mir notéiren awer keng Donnéen.

A vill méi muss een nët maachen. Ekippéiert Iech mat enger Schëpp a gidd mol op d’Spillplazen an ärer Géigend kucken.